ភ្នំពេញ៖ លោក ហ៊ុន ម៉ាណែត បានថ្វាយសារលិខិតចំនួន២ ទៅកាន់ព្រះមហាក្សត្រព្រះបរមនាថ នរោត្តម សីហមុនី និងព្រះមហាក្សត្រី នរោត្តម មុនិនាថ សីហនុ ដែលជាលិខិតដំបូងដែលលោកបានចុះហត្ថលេខាក្នុងនាមជានាយករដ្ឋមន្ត្រីកម្ពុជា។

ក្នុងលិខិតនោះលោក ហ៊ុន ម៉ាណែត បានថ្លែងអំណរថ្វាយចំពោះព្រះមហាក្សត្រ និងព្រះវររាជមាតាដែលទ្រង់បានយកចិត្តទុកដាក់ និងមានជំនឿចិត្តលើរូបលោកឱ្យធ្វើជានាយករដ្ឋមន្ត្រីកម្ពុជា ក្នុងអាណត្តិទី៧នេះ។

លោកបានប្ដេជ្ញាបំពេញការងារដោយស្មោះត្រង់ និងទទួលខុសត្រូវក្នុងការបម្រើជាតិ មាតុភូមិ និងប្រជាជនកម្ពុជា ជាពិសេសការបន្តធានាការពារឯករាជ្យជាតិ អធិបតេយ្យជាតិ និងបូរណភាពទឹកដី ការពារធានាដល់រាជបល្ល័ង្ក និងរបបរាជានិយម សុខសន្ដិភាព ស្ថិរភាពសង្គម និងបន្តការអភិវឌ្ឍជាតិ ជីវភាពប្រជាជនឱ្យកាន់តែរីកចម្រើនក៏ដូចជាលើកស្ទួយកិត្យនុភាពជាតិលើឆាកអន្តរជាតិផងដែរ៕